Küchennews

Hier findest du spannendes aus der Küche.

Menüplan.pdf

26.07.2019 - Freitag

Mir si bereits am letschte Lagertag aglangt.
Dr Fritig bedütet für d Chuchi au ufruume und putze. So hets zum Zmittag 10 kg Spaghetti Carbonara oder Tomatesauce geh. So het d Kuchi hüt scho fast die ganz Kuchi chönne putze.
Am Nomitag si mir d Vorfüherige vo de Kids go luege und hei Gruppeföteli gmacht.
No vorem Znacht si d Sandwich für die morgigi Rückreis gmacht gsi und d hälfti vom Material isch verpackt gsi.
Zum Znacht hets 12 kg heisse Fleischkäse mit grüenem und Teigwaresalat geh.
In dr ganze Wuche het d Kuchi rund 1500 Liter Tee produziert.
De Tee isch jewils in Bidons abgfüllt worde und so het d Kuchi 1800 Bidons gwäsche in dere Wuche.
Füre Salat sind in dere Wuche 150 Salatköpf gschnitte und rund 45 Liter Salatsauce produziert worde.
D Köchin (Rebekka) het in dr Wuche 25x dr Kipper putzt.

25.07.2019 - Donnerstag

Hüte hets bim Mittag 180 panierti Schnitzel, 10 kg Krewettli und 5 kg Zuccetti provoncal (an Tomatensauce) geh.

Bim Znachtesse hets mit de Älpler Makkrone e klassiker geh. Für das sind 10 kg Penne, 15 kg Härtöpfel, 10 L Milch und 3 Liter Rahm verarbeitet worde.

Bim Dessert isch denn e Revanche vom letschte Johr ufem Programm gstande. Dr Tom het (no immer im Siegesrausch vo letscht Johr) d Kuchi erneut ufgforderet sini beliebti Dawa creme gege e selber gmachti Schoggicreme loh aztrette
Doch d Kuchi het us dr Niederlag glernt... vorem Dessert isch dr Tom in dr Kuchi igschlosse worde, dass er d Kids au jo nid beiflusse cha. 😉 dä entscheid schiint gwürkt zha.. d Creme vo dr Kuchi het das Johr nämmli überläge gwunne ;-)


Fotos vom Schoggicreme Duell folge demnächst!

24.07.2019 - Mittwoch

Am hütige Tag hei eus d Kinder bim Zmittagesse völlig Leer „gfresse“.
Es het 650 Stk Fischstäbli, 10 kg Rahmspinat und 25 kg Härtöpfel geh. D Kinder hei das so gärn gha, dass alles im Nu weg gsi isch.

Bim Znacht het d Kuchi ihre Freie Obe gha. Dasmol hei dr Tom und dr Räto würkli s Zepter in dr Kuchi übernoh und hei Grilliert. An dere Stell möcht sich s Kuchi-Team recht herzlich Bedanke!!

Do no e chline Hiwiis ufe morgig Tag. D Kuchi loht d Niederlag vo letscht Johr im Schoggi-creme Duell nid uf sich sitze.. doher gits Morn zobe bim Dessert s 2. Duell!!
Für das sind hüt in dr Kuchi 1.2 kg früschi!! Schoggi verarbeitet worde!! Morn halte mir euch uf eusne Social Media Kanäl und uf dr Homepage ufem laufende ;-)

23.07.2019 - Dienstag

Für hüt gits wieder es paar interesannti Infos zu de verbruchszahle:
Bis hüt het d Kuchi ca. 600 L Tee produziert... bi dem Wätter werde wahrschinli no einigi Liter drzuecho.
Am Morge hei d Kinder bis jetzt rund 100 L Milch, 35 kg Brot/Zopf konsumiert.

Zum Zmittag hets hüte Gschnätzlets mit Härtöpfelstock und Gmües geh.
D Kinder hei hüt ordentlich Hunger gha, odr ischs ächt dra gläge, dass dr Tom und Reto grossartig verzellt hei, dass sie s ässe kocht heige... wär het ihne ächt de Floh ins Ohr gsetzt....

22.07.2019 - Montag

Fürs hüttige Zmittag hets im Tom sis lieblings Esse geh. Brätchügeli anere Currysauce und Riis.
Natürli hei mir au do wieder ortentlich Mänge brucht. 12 kg Brätchügeli und 15 kg Riis.

Zobe hets Rahmschnitzel geh, dass isch abr vom Schwein gsi und nid vo de Rinder, wo hüt am Morge in dr chälblihalle, wo grad näb dr Kuchi isch, versteigeret worde sind.
Das isch es spektakel gsi für alli Kinder und Leiter.
Zum Dessert het früsch gmachte Fruchtsalat mit Wassermelone, Ananas, Öpfel, Banane, Brombeeri, Himbeeri und Erdbeeri geh.

Es goht jo scho länger s Grücht ume, dass d Kuchi z Wenig Salz verwendet... am hüttige Tag sind in dr Lagerkuchi 2.5 kg Salz verwendet worde....;-)

s Zmorge

21.07.2019 - Sonntag

Für e hütige Tag hei mir do einigi Zahle...
Am Morge hei d Kinder 30 Liter Milch trunke und ca. 6 kg Zopf gässe.
Zum Zmiitag hei d Kinder 48 kg Polenta, 18 Kg Pouletgschnetzlets und 7.5 kg Gmües gässe.
Bim Znacht isch denn zum krönende abschluss 30 kg Hörnli und 18 kg Hackfleisch konsumiert worde.

20.07.2019 - Samstag

Au d Chuchi het dr Weg uf Herisau gfunde. Nochdem sie sich in dr Kuchi igrichtet und alles uspackt hei, isch ihne folgendes ufgfalle...
Nid mitcho isch unteranderem s Öpfelmues, wo am Sunntigzobe fürs Znacht brucht werde. Das isch abr keis Problem gsi und scho e Stund spöter isch das kauft gsi.
S nöchste wo gfehlt het isch dr Teechocher gsi (siehe Foto). Dä isch sehr wichtig in dr Kuchi, will mir mit dem euses Teekonzentrat möche.
So isch dr Kurt W. zämme mit em Kurt H. quer durch Herisau gfahre und hei so es Grät gsuecht... fündig sind sie denn in dr Landi worde und hei de denn mit grossem Stolz ins Lagerhuus brocht.

Ah jo, znacht hets au no geh:-)
Wie jede Samstig bim Lagerbeginn hets Ravioli geh. D Kinder hei sage und schreibe 45 kg Ravioli, 3 kg Reibkäse und 18 Köpf Iisbergsalat gässe.
So darfs gern witer go ;-)